Rwanda Shima Imana 2026: Minisitiri w’Intebe n’abayobozi b’amatorero bahuriye kuri Stade Amahoro

Minisitiri w’Intebe n’abayobozi b’amatorero bitabiriye Rwanda Shima Imana 2026

Abayobozi b’amatorero n’Abanyarwanda bo mu madini n’amatorero atandukanye bitabiriye igiterane ngarukamwaka cya Rwanda Shima Imana 2026, cyabereye kuri Stade Amahoro.Iki giterane cyabaye ku nshuro ya 14, cyongera guhuriza hamwe Abanyarwanda basengera mu matorero atandukanye, mu rwego rwo gushima Imana no gusengera igihugu.

Muri iki giterane habonetse abayobozi bakomeye b’amatorero barimo Apôtre Dr Paul Gitwaza, uyobora Zion Temple Celebration Center ku Isi, ndetse na Apôtre Mignonne Alice Kabera, uyobora Noble Family Church akaba n’Umuyobozi Mukuru wa Women Foundation Ministries.

Abayobozi mu nzego nkuru za Guverinoma y’u Rwanda na bo bifatanyije n’abitabiriye iki giterane. Muri bo harimo Minisitiri w’Intebe, Dr. Justin Nsengiyumva, wari umushyitsi mukuru, Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, na Minisitiri w’Ubutegetsi bw’Igihugu, Dominique Habimana, hamwe n’abandi bayobozi.

Mu gihe cy’igiterane, abitabiriye bahawe umwanya wo kuramya no guhimbaza Imana binyuze mu ndirimbo n’ubutumwa bwatanzwe n’abayobozi b’amatorero.

Abahanzi n’amakorali barimo Aime Uwimana, René Patrick na Tracy Agasaro, Tonzi, Gaby Kamanzi, Korali Hoziana na Korali Ijwi ry’Impanda bafashije abitabiriye gutarama no guhimbaza Imana.Rwanda Shima Imana ni igiterane ngarukamwaka gihuriza hamwe Abanyarwanda bo mu matorero atandukanye, kikaba umwanya wo gushimira Imana ku gihugu no gusengera u Rwanda n’abaturage barwo.