DRC: Icyorezo cya Ebola cyabaye icya mbere cyishe benshi mu mateka y’iki gihugu

DRC: Ebola yahitanye abantu 2,325, iba icyorezo cyahitanye benshi mu mateka y’igihuguIcyorezo cya Ebola gikomeje kwibasira Repubulika Iharanira Demokarasi ya Congo (DRC) kimaze kuba icyorezo cyahitanye abantu benshi kurusha ibindi byigeze kubaho muri iki gihugu.Imibare mishya yatangajwe n’inzego z’ubuzima igaragaza ko abantu 2,325 bamaze guhitanwa na Ebola mu bantu 4,945 bamaze kwandura, imibare ituma iki cyorezo kirenga icyabaye hagati ya 2018 na 2020, ubwo abantu 2,299 bahitanwaga na Ebola.

Icyorezo cyatangajwe ku mugaragaro ku wa 15 Gicurasi 2026, ariko abahanga bavuga ko virusi ishobora kuba yari imaze igihe ikwirakwira mbere y’uko imenyekana. Kugeza ubu, Ebola imaze kugera mu ntara esheshatu za DRC, aho Ituri ari yo yibasiwe cyane. Iki cyorezo giterwa n’ubwoko bwa Bundibugyo bwa virusi ya Ebola. Ubu bwoko buratandukanye n’ubwa Zaire bwakunze guteza ibindi byorezo bikomeye, kandi kugeza ubu nta rukingo cyangwa umuti byemewe ku mugaragaro byihariye kuri ubu bwoko;

hari ibigeragezwa bya siyansi biri gukorwa. Ikibazo gikomeye ni uko umubare w’abandura n’abapfa uri kwiyongera vuba. Ishami ry’Umuryango w’Abibumbye ryita ku Buzima (WHO) n’izindi nzego z’ubutabazi zagaragaje impungenge ku muvuduko iki cyorezo kiri gukwirakwizwaho, mu gihe ibikorwa byo kugikumira bikomeje guhura n’inzitizi zirimo amakimbirane, ibikorwa remezo by’ubuzima bidahagije, amakuru atari yo ndetse no kutizera abakozi b’ubuzima.

Ugereranyije, iki cyorezo kimaze kuba icya kabiri cyahitanye abantu benshi ku Isi mu byorezo bya Ebola byanditswe, kikaba gikurikiye icyorezo cyabereye muri Afurika y’Iburengerazuba hagati ya 2014 na 2016, cyahitanye abantu barenga 11,000.