RDC: Abasirikare 18 bakatiwe urwo gupfa bazira guhunga urugamba
Urukiko rwa Gisirikare rwa Uvira muri Repubulika Iharanira Demokarasi ya Congo (RDC) rwakatiye abasirikare 18 bo muri Batayo ya Simba igihano cy’urupfu, nyuma yo kubahamya ibyaha bifitanye isano no gutinya urugamba no guhunga inshingano zabo za gisirikare.
Aba basirikare bari bakurikiranyweho icyaha cyo kugaragaza ubugwari ku rugamba, mu gihe ubushinjacyaha bwa gisirikare bwari bwasabye urukiko kubaha igihano cy’urupfu.
Urubanza rwabo rwatangiye kuburanishwa ku wa 23 Kanama 2026, rukaba rwaribanze ku byaha aba basirikare bashinjwaga mu gihe ingabo za RDC zikomeje imirwano n’abarwanyi b’ihuriro AFC/M23 mu bice bitandukanye byo mu burasirazuba bw’iki gihugu.
Urukiko rwemeje igihano cy’urupfu
Ku wa 4 Nzeri 2026, Urukiko rwa Gisirikare rwa Uvira rwatangaje umwanzuro warwo, rwemeza ko abasirikare 18 bahamwa n’ibyaha bashinjwaga ndetse rutegeka ko bakatirwa igihano cy’urupfu.
Perezida w’Urukiko rwa Gisirikare rwa Uvira, Lieutenant Colonel Mupenda Munangi Joel, yavuze ko urukiko rwafashe uyu mwanzuro rushingiye ku kuba aba basirikare barahamijwe ibyaha baregwaga.
Yagize ati: “Bityo rero, bakatiwe igihano cy’urupfu nta kwitabwaho kw’impamvu zagabanya uburemere bw’igihano.”
Iki gihano cyafashwe mu gihe ingabo za RDC zikomeje guhangana n’ibibazo bikomeye ku rugamba rwo mu burasirazuba bw’igihugu, aho imirwano hagati y’ingabo za Leta n’abarwanyi b’ihuriro AFC/M23 imaze igihe itera impinduka ku mitwe y’ingabo n’abaturage bo muri ako karere.
Urubanza rw’aba basirikare kandi rugaragaza uburemere ingabo za RDC zishyira ku basirikare bashinjwa guhunga imirwano cyangwa kunanirwa kuzuza inshingano zabo mu gihe bari ku rugamba.
